Kwach na kungiyar Flying Eagles ta Najeriya, Samson Siasia, yace zai yi wuya kungiyarsa ta shiga cikin gasar nan ta Super Six da aka shirya domin kungiyoyin dake wakiltar Najeriya a wasannin nahiyar Afirka.
Siasia yace wannan gasa da aka shirya daga ranar 22 zuwa 29 ga watan nan na Janairu, yaci karo da shirin da kungiyarsa ta yi tun farko na zuwa kasar Tunisiya domin wasanni biyu na sada zumunci a ranakun 24 da kuma 28 ga wata, yana mai fadin cewa wasannin sada zumuncin zasu taimakawa ‘yan wasan nasa wajen Karin kwarewa.
Yace, “ina jin cewa wasannin da zamu yi a Tunisiya zasu fi yin amfani ga ‘yan wasan fiye da wasannin Super Six a nan cikin gida. ‘Yan wasan dake cikin kungiyar nan a yanzu, an zabe su cikin tsanaki, babu kamarsu a tsakanin masu shekarunsu a kasar nan, kuma ina da kwarin guiwar cewa zasu taka muhimmiyar rawar da muke so idan lokacin da ake bukatar hakan yayi.”
Samson Siasia dai yace har yanzu bai gama tace ‘yan wasan ba a saboda bai gansu a filin wasa na zahiri inda suke karawa da wata kungiya ba, yana mai fadin cewa zai salami wasu a bayan wadannan wasannin sada zumunci da zasu yi.
