A jiya Kungiyar kwallon kafa ta Barcelona ta samu nasarar zuwa wasan karshe na Copa del rey 2016/2017, Bayan ta tashi kunnen doki 1-1 tsakaninta da Atletico Madrid a wasan kusa da karshe (Semi final) a karawarsu ta biyu inda a haduwarsu ta farko Barcelona, ta doke Atletico, daci 2-1 a gidan Atletico, wannan ya sa take da kwallaye 3 ita kuma Atletico nada 2.

A yau kuma za'a fafata a sauran wasan na Copa del rey Alaves zata karbi bakuncin Celta Vigo, cikinsu duk wacce tayi nasara zata kara da Barcelona a wasan karshe. A karawarsu ta farko dai an tashi 0-0 a gidan Celta Vigo.

Bangaren hada hadar ‘yan wasan kwallon kafa na duniya kuwa, kungiyar kwallon kafa ta Real Madrid, na neman tsohon dan wasan Barcelona, wanda yanzu yake taka leda a kungiyar Chelsea Cesc Fabregas.

Har ila yau Real Madrid, din tana zawarcin Hugo Lioris daga Tottenham,

Barcelona ta fada zawarcin Victor Lindelof, dan shekara ashirin da biyu da haihuwa daga Benfica akan kudi fam miliyan £50. Ita kuwa kungiyar Atletico Madrid tace tanada yakinin cewa tsohon dan wasan gabanta Diego Coast, zai iya komowa Kungiyar amman ba nan kusaba domin abune mai wuya kulob dinsa ta Chelsea su sakeshi a yanzu haka.

Manchester City tace ko kadan bata da niyar Sayar da dan wasanta Sergio Aguero a wannan karon

Shikuwa Alvaro Morata ya shaida wa kungiyarsa ta Real Madrid, kan cewa yana da sha'awar taka leda a kungiyar kwallon kafa ta Chelsea dake kasar Ingila