Hukumar ‘yan sanda a jihar Gombe dai ta hana hawa babura kowanne irine a jihar har na tsawon kwanaki hudu kuma an farane daga jiya Lahadi.
Matakin hana hawa baburan dai an dauke shine saboda tada bama bamai da akayi jiya wanda wasu yan kunar bakin wake sukayi alokacin da suke kan babura.
Kakakin ‘yan sandan jihar Gombe yayiwa wakilin mu Abdulwahab Muhammad karin bayani kan cewar, akwai ‘yan kunar bakin wake har guda biyu mace da namiji akan babur dauke da bom a jikinsu suka kuma tada shi inda ya kashesu baki daya, sai kuma wani dan kunar bakin waken dake kasuwar ‘yan katako shima ya mutu.
A yau dai shugaba Goodluck Jonathan zaizo jihar Gombe, a yayinda shima ‘dan takarar shugaban kasar Najeriya janal Muhammadu Buhari zai kawo ziyara gobe in Allah ya kaimu.
