Kungiyar kwallon kafa ta Arsenal tana shirin kai chafa kan matashin dan wasan Monaco kuma dan kasar Faransa Kylian Mbappe. Arsenal dai ta ware zunzurutun kudi har pam miliyan dari da ashirin da biyar (125), domin dan wasan.
Idan har cinikin ya kaya zai kasance ya zarce wanda akayi a shekarar da ta gabata inda Manchester United, ta kashe pam miliyan tamanin da tara (89) akan Paul Pogba, wanda shima dan kasar Faransa ne domin ya dawo kungiyar Manchester United.
Jaridar Mirror, tace shugaban Arsenal, Wenger, zai yi amfani da sanaiyarsa a Faransa domin shawo kan dan wasan mai shekaru goma sha takwas domin ya amince da zuwa Arsenal kasancewa itama Real Madrid, tana zawarcinsa.
Jaridar ta kara da cewa Wenger, tuni ya gana da mahaifin dan wasan wanda kuma yake taka muhimiyar rawa a harkar kwallonsa.
A wasani hamsin da tara (59) a gasar Ligue 1, da ya buga a kakar bara ya jefa kwallaye ashirin da bakwai (27) a raga ya kuma taimaka an jefa wasu goma sha bakwai (17) a raga.
Yanzu dai a Turai tauraruwar Mbappe ne ke haskawa.
Facebook Forum