An sallami ‘dan wasan kungiyar Enyimba dake birnin Aba cikin jihar Abia Mfon Udoh daga sansanin horon ‘yan wasan Najeriya na Super Eagles.
Dan wasan Mfon Udoh da sauran ‘yan wasan da aka gayyata sun isa sansanin horon ne a ranar Alhamis, an kuma sallami Udoh ne a dalilin ciwon da yake fama da shi wanda yayi sanadiyar rashin bugawa kulub ‘dinsa na Warriors wasa, ya dai sami wannan ciwo ne a wata arangama da yayi da ‘dan wasan nan na Warrior wato Alkanemi a wasan da suka buga na sati goma cikin kakar wasan nan a ranar Laraba.
Babban kocin Najeriya Stephen Keshi ya tabbatar da cewa Udoh zai dawo cikin ‘yan kungiyar, idan har sami ya farfadowa daga kalubalen lafiya da yake fuskanta.
Yanzu haka zakarun wasan nahiyar Afirkan dai sun fara shirye shiryen wasan fitar da gwani na shiga gasar cin kofin nahiyar Afirka 2017 AFCON da zasu buga da kasar Chadi. Da yawan ‘yan wasan da aka gayyata sun isa masaukan su a birnin tarayya Abuja.
Keshi ya bukaci ‘yan wasan da su nuna yunwar su da sadaukarwa har ma ‘da’a, yakuma bukace su da su ‘dauki wanan damar ta gayyatar su da akayi da muhimmanci wajen wakiltar kasar su.
