Wani yunkurin da 'yan Boko Haram suka yi na kai farmaki a garin Biu dake jihar Borno a yau laraba ya ci tura, a bayan da mutanen garin suka mike domin dafawa sojoji wajen kare garin nasu daga wadannan 'yan ta'adda.
A yau da safe ne 'yan Boko Haram din suka kai farmaki a kan wani wurin da sojoji ke binciken ababen hawa a bayan gari, har motarsu guda ta samu shigewa ta doshi inda barikin sojoji yake.
Amma da aka fara samun labarin abinda ke faruwa, maimakon jama'a su fara gudu, sai 'yan kato-da-gora na garin suka yi tsaye suka doshi inda ake fadan.
Wannan ya kara ma sojojin dake tsare wannan gari kuzari, suka dirkaki mayakan na Boko Haram aka yi ta musanyar wuta.
Wani dan kato da gora yace an kashe musu mutum guda, su kuma sun kashe mayakan Boko Haram akalla 15, abinda ya sa su 'yan Boko Haram din suka juya suka tsere.
Ga cikakken bayani daga bakin mutanen garin na Biu...
