Mai kula da ‘yan wasan kasar Brazil, masu fafatawa a gasar Olympics, Rogerio Micale, ya ce inda har masu kallon wasan kwallon kafa a Brazil, basu daina yiwa Neymar rashin mutunci ba zai daina bugawa kasar wasan kwallon kafa.
‘Yan kungiyar ta Brazil, masu fafatawa a gasar Olympics, suna kokarin ganin cewa sun haye,bayan da suka yi kunnen doki, a wasan da suka buga da kasar Iraqi da kasar Afirka ta kudu.
Biyo bayan rashin nasara lashe wasani da suka buga da kasashen Iraqi da Afirka ta kudu sai Neymar ya zama abin tsangwama.
Mai horar da ‘yan wasan ya ce wata rana Neymar, zai kasance dan kwallon da yafi kowa a duniya, ya kyautu mu daraja ‘yan wasanin mu, idan har bama duban ‘yan wasan mu da kima suna iya kin bugawa kasar wasan kwallon kafa.
Neymar dan shekaru 24, ya jefawa Brazil kwallaye 46, a raga a wasani 70 da ya bugawa kasar.
