A jiya litini ne wasu ‘yan fashi suka afka gidan dan wasan kwallon kafar nan na kungiyar Super Eagles, Ogenyi Onazi, dake Jos, babban birnin jihar Plateau.
Kakakin kungiyar kwallon kafa ta Super Eagles Toyin Ibitoye ya tabbatar da afkuwar lamarin, inda ya bayyana cewa ‘yan fashin sun yi awon gaba da kaya da dama wadanda suka hada da mota kirar Toyota Highlander, da kuma makudan kudade.
Rahotannin sun bayyana cewa ‘yan fashin sun ci zarafim mahaifin dan wasan kwallon kafar yayin da suka sami kutsawa cikin gidan.
Dan wasan ya bayyana cewa barayin sun bar rubutaccen sako cewa wannan somin tabi ne a jerin hare haren da suka kudiri niyyar kaiwa gidan nasa.
Onazi ya kara da cewa ‘yan fashin sun sami shiga gidan nasa ne ranar litini da misalin karfe 1:40pm, inda suka badda kama a matsayin masu kai sakon wasika, kuma suka daure mahaifin sa sa'an kuma suka ji masa raunika da adda bayan sun gama bugun sa.
Ya ce, ‘yan fashin sun ce sun sha alwashin sake komawa gidan kuma shi dan wasan suke bukatar kamawa.
