A wasan da aka buga guda daya tilo da ya rage a bangaren Firimiya lig na kasar Ingila 2016/17 mako na talatin da shida, jiya kungiyar kwallon kafa ta Chelsea ta lallasa Middlesbrough's da kwallaye 3-0.
Wannan nasara da Chelsea ta samu a jiya ta bata karfin Guiwa na iya Lashe gasar Firimiya a bana inda a yanzu haka Chelsea, take mataki na daya da maki 84 Tottenham, tana biye da ita da maki 77, saura wasannin ukku duk da kwantai a kammala gasar a bana.
Ranar Jumma'a mai zuwa kungiyar ta Chelsea, zata kara da Westbromwich, wannan ke nuni da cewar idan Chelsea, ta samu nasara a kan Westbromwich, ya tabbata ta Lashe gasar Firimiyar Ingila ta shekarar 2016/17.
A daya bangaren kuwa na gasar cin kofin zakarun nahiyar Turai (UCL) 2016/17 a matakin wasan dab da na karshe (Semi-final) zagaye na biyu, a yau kungiyar kwallon kafa ta Juventus, zata karbi bakuncin Monaco, inda karawarsu ta farko, Juventus ta doke Monaco 2-0 a gidanta.
za'a buga wasan na yau ne da misalin karfe takwas saura kwata na dare agogon Najeriya, Nijar, kamaru da Kasar Chadi.
