Manchester City na zumudin ganin ta kawo Lionel Messi, zuwa kungiyar a shekara mai zuwa inda suka shirya biyan ‘dan wasan fan dubu 800 a duk mako.
A cewar gidan jaridar UK Sun wakilan Manchester City da na Messi har sun fara tattaunawa kan wannan batu na canjin kulab, kasancewar ana ganin ‘dan wasan mai shekaru 28 da haihuwa na shirin barin Bercelona.
Yanzu haka dai Messi na da shekaru biyu da suka rage masa da Barcelona, kan kwantiraginsa da ake biyansa fan dubu 500 a duk mako, ana ganin dai Barcelona ba zata ji dadi ba idan har Messi bai sabunta kwantiraginsa ba.
Manyan jami’an kungiyar Manchester City na ganin zasu iya tabbatar da faruwar wannan canji, musammam ma tunda ga sabuwar yarjejeniya ta Talabijin da zata biya kimanin yiro miliyan 150 a duk kakar wasa da za’a fara bada dadewa ba.
Haka kuma jaridar UK Sun, tayi da’awar idan har Messi ya koma Ingila to abu ne mai yiwuwa Pep Guardiola ya zamanto sabon Manajan kulab din.
