Kamfanin wayar hannu na Apple ya kaddamar da sabuwar wayar hannu mai samfarin 4-inch SE wadda ita ce ta hudu da ya fitar tun shekarar 2013 wadda ya kwatanta ko ya bayyana a matsayin wadda tafi ire iren 4-inch inganci, wayar dai kamar yadda kamfanin ya ce, tana dauke da kayayyaki da kuma tsarin kirar babbar wayar sa ta iphone 6s kuma a farashi mai rahusa.
Wayar ta yi kama da iphone 5s amma an fitar da wayar da tambarin kamfanin na apple mai launin bakin karfe, kuma ana iya samun nau’i daban daban kamar su nau’in azurfa, da mai ruwan zinzri, da mai nau’in farin zinari da kuma mai ruwan toka.
Wayar tana dauke da kayayyaki masu taimaka ma mai amfani da ita tamkar na iphone 6s plus wato irin manhajar nan dake iya ba mai amfani da ita amsar tambaya ta amfani da murya wadda aka fi sani da “HEY SIRI” a kowane lokaci, da kuma batiri mai karko.
Kamfanin ya bayyana cewa wayar nada saukin farashi kuma tana dauke da sababbi da kuma wasu tsofaffin abubuwan da ba’a canza ba kamar karfin kyammarar daukar hoto da bidiyo suna nan kamar yadda aka sanu su.