Kungiyar kwallon kafa ta Al-Malakia ta kasar Sudan ta Kudu, ta sha kashi a hannun takwararta ta Kano Pillars a ranar Asabar din data gabata a wasan da sukayi a filin wasa na Sani Abacha dake Kano da ci uku ba ko daya, a cigaba da wasannin gasar zakarun kungiyoyin nahiyar Afirka.
Dan wasan kungiyar Kano Pillars Gambo mohammed, ne ya zura kwallo ta farko a ragar kungiyar kwallon kafa ta Al-Malakia, mintuna talatin da takwas da fara wasan, daga bisani ‘dan wasa Adamu Hassan yaci kwallo ta biyu mintuna tamanin da tara, minti daya kafin wasa ya kare.
Alkalin wasa dai ya bada karin mintuna hudu kamar yadda aka saba, minti biyu bayan karin ‘dan wasa Gambo Mohammed, ya sake jefa kwallo ta uku, wannan nasara dai ta baiwa Pillars shiga mataki na gaba na gasar, inda zata kara da kungiyar Moghreb Tetouan ta Morocco.