Ana tsammanin koch din Super Eagles Sunday Oliseh, zai gayyato wasu ‘yan wasa da suka hada da Victor Moses da John Mikel Obi da Odion Ighalo, zuwa wasan kawance da Najeriya zata buga da kasar Kamaru da Kongo.
Kamar yadda wasu rahotanni suke nuni, dole ne sai ‘yan wasan suna buga wasanni a kungiyoyin su na Turai akai akai kafin su cancanci wannan gayyata.
Baki daya dai ‘yan wasan uku Moses da Mikel da Ighalo duk sunyi wasanni satin da ya wuce a kungiyoyinu wato West Ham da Chelsea da Watford.
Ana kyautata zaton cewa Elderson Echiejile zai dawo kungiyar Super Eagles, amma akwai tantama kan kaftin din kungiyar wato Vincent Enyeama.
Ana kuma sa ran Oliseh zai fitar da sunayen ‘yan wasa hudu da suke wasa a gida, domin wasan kawancen da za’a yi a kasar Belgium.