‘Yan sanda sun cafke wasu matasa su uku da ake zargi da fashi da makami a jahar Enugu, an kama matasanne bayan sun yi ma wani mutum fashin kirar Toyota Venza mai lamba APP 7080 W a karamar hukumar Igboeze jahar Enugu.
Wanda ya jagoranci wannan aika aika mai suna Arinze Eya, ya bayyana cewar ya jawo sauran matasan biyu su taimaka masa ne domin ya samu ya kwace motar mutumin ya sami abin tafiya zuwa kasar Indonesia.
Matashin ya bayyana cewa mahaifin sa jami’in dan sanda ne ya kara da cewa kimanin shekaru biyu da suka gabata ya tambayi mai motar ya tallafa masa da kudi domin ya samu ya tafi amma bai bashi ba.
A cewar sa, daya daga cikin abokan da aka kama su tare dan uwan sa ne, dayan kuma babu dangantaka tsakanin su.
Rahotanni sun bayyana cewa an kama matasanne da taimakon ‘yan banga a yayin da motar ta sami hatsari akan hanya zuwa inda wani mutum yayi masu alkawarin zai biya su kudi Naira miliyan biyu da dubu dari biyar.
