Tamkar wasan kwaikwayo! wani saurayi da budurwar sa da ke zama a birnin Houston dake jahar Texas ta kasar Amurka sunyi aure ba shiri a wani asibiti, kamar yadda rahotanni suka bayyana, kuma an daura auren ne a cikin wasu 'yan mintuna kalilan.
A lokacin da aka daura auren, budurwar mai suna Staphanie Tallent tana da tsohon ciki na kusan wata tara, kuma ta je awon ciki a ranar juma'a inda daga nan ta fara jin alamun nakudar haihuwa ta kama ta.
Saurayin ya dauki budurwar ta sa zuwa asibiti inda zata haihu sai dai kuma ba su da wata takardar shaidar aure a tsakanin sa da budurwar sa dan haka nan da nan sai saurayin ya garzaya motar sa ya dauko wani farin kyalle, ya kuma kira wani malamin addini a asibitin, su ka tara likitoci da wasu ma'aikatan asibitin, suka zagaye saurayin da budurwar sa sannan malamin ya daura masu aure.
An daura auren ne a kasa da mintuna talatin, kuma ana gamawa nan da nan ma'aikatan asibitin suka shirya ta sa'annan suka garzaya dakin tiyata inda aka yi mata aiki.
Talent ta sami diya mace wadda ta rada wa suna Sophia, kuma tana da nauyin kilogiram uku da digo uku. Yanzu haka dai Talent da saurayinta sun zama miji da mata kuma sun sami karuwa a ranar da suka daura wannan aure a asibiti.
