Babban Kwac na kungiyar kwallon kafa ta kasar Masar Hector Cuper ya ce kungiyar ‘yan wasan sa sa ran samun nasarar doke kungiyar Super Eagles a karawar farko da zasu yi ta shiga gasar cin kofin nahiyar Afirka na shekarar 2017.
Kungiyar Super Eagles ce zata karbi bakuncin kungiyar ‘yan wasan na Pharoas a karshen wannan makon, bayan nan kuma zasu dunguma zuwa Alexandria domin mayar da martani.
A yanzu haka Kungiyar ‘yan wasan Misira ne kan gaba a rukunin G da maki shidda, yayin da Najeriya ke biye da ita da maki hudu, yanzu haka kwac din Misira Cuper na sa ran samun babban maki a yayin da suka hadu da kungiyar Super Eagles a filin wasa na Ahmadu Bello dake jahar Kaduna.
A wata hira da manema labarai da tsohon manajan kungiyar Inter milan yayi a jiya ranar lahadi a babban birnin kasar, ya ce “ ko shakka babu zasu doke kungiyar Super Eagles ta Najeriya”.
A Najeriya kuma, babban kocin wucin gadi na kungiyar Super Eagles Samson Siasia ya zabi ‘yan wasa shidda na cikin gida a jerin ‘yan wasa ashirin da biyu da zasu taka leda a wasan shiga gasar cin kofin Nahiyar Afirka da Najeriya zata kara tsakanin ta da kungiyar ‘yan wasan Misira.
A cikin ‘yan wasan da aka zaba sun hada da Chibuzo Okwonkwo, da Etebo Oghenekaro, da Ekechukwu Ezenwa, da Ifeanyi Mathew, da Mathew Etim da kuma Kalu Orji.
Zasu hadu da sauran ‘yan wasa goma sha takwas da ke bugama wasu kungiyoyin kasashe waje wasa. Ranar asabar 25 ga wannan watanne Najeriya zata karbi bakuncin takwararta ta kasar Misira kafin ta mayar da martani a ranar 29 ga wannan watan.
